پەیمانگەها زاخۆ مێهڤانداریا دووەمین کۆنفرانسێ زانستی یا قوتابییان کر (2025-04-27)

رۆژا ئێک شەمبێ رێکەڤتی ٢٧/٤/٢٠٢٥، ب ئامادەبونا "د.محەمەد عەلی" رێڤەبەرێ گشتیێ سازیا شەهید یا پەروەردە و خواندنا بلند، "د.فەرهاد حەمەد" ئەندامێ بوردێ، "فارس یوحەنا" جێگرێ سەرپەرشتیارێ ئیدارەیا سەربەخویا زاخۆ و چەندین رێڤەبەرێ حکومی و ماموستایێن زانکو و پەیمانگەهان، پەیمانگەها زاخۆ یا نەحکومی مێهڤانداریا دووەمین کۆنفرانسێ پەیمانگەهێن پێنچ سالی یێن پەیمانگەهێن سەر ب سازیا شەهید ڤە کر ل بن دروشمێ ( نڤشەکێ زانستخواز و پاشەرۆژەکا دلنیا و پایەدار). ل دانێ سپێدێ پشتی ب دوماهی هاتنا بەرنامەیێ دووەمین کۆنفرانسێ زانستیێ سازیا شەهید؛ و ل دانێ ئێڤاری ژی بەرنامەیەکێ تایبەت هاتبوو رێکخستن، و ب ڕاوەستیانا بێ دەنگیێ ل سەر گیانێ شەهیدێن کوردستانێ بەرنامەیێ کۆنفرانسی دەست پێکر. لدویف دا پەیڤەک ژلایێ "م.سەردار عومەر" رێڤەبەرێ پەیمانگەها زاخۆیا نەحکومی ڤە هاتە پێشکێشکرن و د پەیڤا خوە دا دیار کر، پەیمانگەها زاخۆیا نەحکومی ب پشتەڤانیا بەردەوام یا سازیا شەهید شیایە ل سەر ئاستێ زانستی، چەندین پێنگاڤێن باش پاڤێژت و ئەڤ پەیمانگەهە ل سەر ئاستێ دەڤەرێ بەرەڤ قوناغەکا دیتر ڤە چوویە و ئەم دخوازین د هەمی سکتەرێن ژیانی دا خزمەتێ بکین و، ئامادەنە بۆ هاریکاریێ دگەل کەرتێ حکومی و تایبەت ژی. لدویف دا پەیڤا سازیا شەهید ژلایێ "د.محەمەد عەلی" رێڤەبەرێ گشتیێ سازیێ ڤە هاتە پێشکێشکرن و گۆت : وەکو سازیا شەهید بەردەوامین ل سەر پێشئێخستنا پەیمانگەهێن خوە و گێرانا کۆنفرانس و ڤیستەڤالێن زانستی یێن ب ڤی ڕەنگی نیشانەکا گەشبینە بۆ بەرەڤ پێشڤە برنا ئاستێ زانستی و ئەم گرنگیەکا تایبەت ژی دینە شیانێن قوتابیان و کار بۆ دروستکرنا بەهرەیێن قوتابیان ژی دکین. پاشی ژی قوتابیێن ئێکەم ل سەر ئاستێ پرۆژەیێن دەرچوونێ ل سەر پشکێن (کومپیوتەر و کارگێری و ژمێریاری و پوستەران) هاتنە دەستنیشانکرن و چەندەک بەحس ل پرۆژەیێن خوە کرن. ل دوماهیێ ژی خەلات ل سەر سەرکەڤتیێن کۆنفرانسی هاتنە بەلاڤ کرن و پاشی ژ رێز ل لژنەیا بلند یا زانستی یا ڤیستەڤالێ هاتە گرتن.